Det var ikkje så lett å spele god fotball i vinden på Rosselandsbanen torsdag. Den første seriekampen på eige kunstgras var prega av lågt tempo og unøyaktig pasningsspel. Gjestene frå Forus låg bakpå og hadde dessutan ein levande vegg i mål. Daniel Gjesteland, som bur på Bryne og trener med Rosseland på fast basis, heldt kvittrøyene frå Stavanger inne i kampen.
Men etter 34 minutt sprakk nullen. Formspelar Geir Dahle Høyland raga høgast og heada kontant ein corner frå Truls Vagle i mål. 1-0!
Forus og Gausel var ikkje ufarlege. Eit par minutt før pause drog midtspiss Mohamud seg forbi Jarle Madland, men Rosseland slapp med skrekken då avslutninga gjekk stolpe ut.
Rosseland hadde vinden meir i mot i andre omgang, og fekk med det betre kontroll på pasningsspelet. Dei oransje skapte mykje trøbbel for FGI, og Super-Geir var på rett plass til rett tid då han auka til 2-0 på ein retur midtvegs i omgangen.
Heimelaget pressa på for å punktere kampen, men 3-0 let vente på seg. Ola Mæland sprang i frå forsvaret og tok ei lynkjapp 1-2-finte på Gjesteland før han trilla ballen i tomt bur.
3-0 var ikkje eit mål for lite ut i frå spel og sjansar, men Rosseland har spelt langt betre kampar denne sesongen.
Ny clean sheet og 7-0 i målforskjell ser bra ut etter to tøffe kamper. Neste runde blir endå tøffare borte mot formlaget Frøyland på gras.
Alexander Skachok, som blir 18 år måndag, kom inn til Rosseland-debut eit par minutt før full tid. |