Eit nydeleg sommerver og nærmare 800 tilskodarar sette flotte rammer for Rosseland sin femte førsterundekamp i NM. Trass i tøft serieprogram stilte førstedivisjonslaget ein knallsterk startellever, det same gjorde Rosseland. Tempoet var høgt og Rosseland tøffa seg i perioder med å stå høgt og jaga bryneforsvaret. Det kosta krefter, men ga og nokre fine sjansar i overtal.
Bryne var ikkje ufarlege. Oppspelspunktet Luka Fajfric skapa uro og gjestene kom til halvsjansar og dødballer. Eit par gonger ropte dei på straffe, men dommer Jørgen Haga la lista høgt denne dagen. Kanskje spesielt for heimelaget.
Kampen bølga voldsomt. Alle elleve i oransje gjorde ein formidabel jobb med å halda naboen på avstand, spesielt sentrallinja var mykje involvert. Ola Mæland vann mykje, sprang mykje og var råsterk med mann i rygg. Einar Lye og Sander Ystanes kriga godt på midtbanen, og bakerst rydda kaptein Peter Time og Jarle Madland opp i stor stil. Det som slapp gjennom forsvaret plukka Sem Aleksander Bergene.
Etter rundt 40 minutt i varmen begynte kreftene å ta slutt. Bryne sette opp tempoet og dei siste minutta før pause var det mykje panisk klarering frå heimelaget. Men Rosseland heldt stand og tok pause på 0-0.
Andre omgang starta rolegare. Lågare tempo og litt mindre jaging frå heimelaget. Bryne spelte seg ikkje til dei store sjansane, men hadde ballen meir enn i starten av førsteomgang.
13 minutt ut i omgangen kom den første karamellen. Eit billeg frispark på venstrekanten vart "bøydd" inn i mål av Nicklas Strunck frå rundt 20 meter. Det høyrer med til historia at Bergene vart hindra både av bryneangriparar og sterk motsol. 0-1.
Begge lag gjorde nokre bytter etter skoringa, men kampbildet var det same. Bryne styrte meir og meir av midtbanen og spelte seg til dødballar.
Eit kvarter før slutt kom den avgjerande skoringa. Ein lut corner frå rosselandsguten Håkon Tveit fann ein umarkert Lars Erik Sødal på første stolpe. 0-2 og game over.
Rosseland greide ikkje å mobilisera ein sluttspurt, men hadde eit par sjanser til å pynta på resultat. Med sletne bein og hovud gjekk det ikkje slik, i staden fekk innbyttar Lasse Qvigstad stjernetreff og fastsette resultatet til 0-3 rett før full tid. |