Den første kampen etter ein lang fotballpause kom tidleg både for Rosseland, Vigrestad og arrangørklubben. Etter ei kort forseinking grunna garderobekluss, var det to nervøse lag som forsøkte å trilla ball i starten av kampen. Kvaliteten var av ymse slag, men Vigrestad si kontring etter åtte minutt var det lite å seie på. Ole Kristian Handeland fekk ballen i bakrom, fekk god plass til å leggja inn, og Bjarne Mæland jr. kunne nærmast spasera inn 1-0 til gjestene.
Kampen opna seg meir etter scoringa og begge lag skapte sjansar. Vigrestad hadde to farlege cornere, medan Rosseland spelte seg til enorme scoringsmoglegheiter. Svein Arne Monsen sette ballen utføre frå 10 meter etter flott angrepspel, Kristian H. Magnusson heade utanfor frå fem meter. Ti minutt før pause redda Magnus Ueland på målsterken etter at keeperen var utspelt.
På overtid kom omsider utlikninga då Magnusson slo keeper Hølland i ein duell og heada ballen i tomt mål, men dommer Sævereid annulerte på mistanke om at noko uregelmentert hadde skjedd.
Rosseland fekk omsider godkjent ei scoring, men måtte vente til andre omgang. Marius Bøe gjorde forarbeidet og Svein Arne Monsen skapte balanse tre minutt etter sidebyttet.
Heimelaget var klart best etter utlikninga og hadde fleire sjanser til å ta leiinga. Magnusson heada i tverrlegger eit kvarter ut i omgangen, men Marius Bøe var ikkje klar på returen. Det var han to minutt seinare då han kjempa seg forbi to Vigrestad-forsvararar og klemte inn 2-1 frå 6-7 meter.
Den fortente leiinga heldt berre eit minutt. Kristian L. Jørgensen fekk det uvanleg lett då RBK-forsvaret stod paralysert og såg på at innbyttaren fekk spasera inn 2-2.
Heimelaget merka at det var lenge sidan sist kamp, og to mann i forsvaret måtte kasta inn handkledet med skade. Vigrestad byrja yppa seg, var farlege på kontringar, men kom ikkje til dei heilt store målsjansane. Rosselandspelarane verka slitne, men banens beste nytta høve fem minutt før fulltid. Svein Arne Monsen vart lagt i bakken og tok sjølv frisparket frå 25 meter. Ein knallhard suser oppe i krysset vart avgjerande for kampen, 3-2.
Vigrestad la fleire spelarar på topp i håp om poeng, dette ga enorme rom framover for heimelaget. Trond Tveit serverte Marius Bøe både ein og to gonger, men spissen hadde brukt opp kruttet og sette ballen utanfor åleine med keeper to gonger i løpet av eit minutt. |